തിരുവനന്തപുരം : പ്ലാസ്റ്റിക് നിരോധനത്തിന്റെ പേരില് വ്യാപാരികളും തദ്ദേശ സ്ഥാപനങ്ങളിലെ ഉദ്യോഗസ്ഥരും തമ്മിലുള്ള തര്ക്കത്തിനു പരിഹാരമായി നിരോധിത പ്ലാസ്റ്റിക് വസ്തുക്കളുടെയും ബദലുകളുടെയും പട്ടിക സംസ്ഥാന മലിനീകരണ നിയന്ത്രണ ബോര്ഡ് പ്രസിദ്ധീകരിച്ചു.
ഭക്ഷണവസ്തുക്കള് പാക്ക് ചെയ്തു നല്കുന്ന പ്ലാസ്റ്റിക് കണ്ടെയ്നറുകളും പലചരക്കു സാധനങ്ങള് പൊതിഞ്ഞു നല്കുന്ന 50 മൈക്രോണിനു മുകളിലുള്ള കവറുകളും ഉപയോഗിക്കാം. ഈ രണ്ടു പ്ലാസ്റ്റിക് ഉല്പന്നങ്ങളുമായി ബന്ധപ്പെട്ടായിരുന്നു കൂടുതല് തര്ക്കങ്ങള്.
ഒറ്റത്തവണ ഉപയോഗിക്കുന്നതും 50 മൈക്രോണില് താഴെയുള്ളതുമായ പ്ലാസ്റ്റിക് നിരോധിച്ച കേന്ദ്ര തീരുമാനം ജൂലൈ 1 നാണ് പ്രാബല്യത്തിലായത്. തദ്ദേശ സ്ഥാപനങ്ങളിലെ ആരോഗ്യവിഭാഗം ഉദ്യോഗസ്ഥര് വ്യാപാര സ്ഥാപനങ്ങള് പരിശോധിച്ചു പല മാനദണ്ഡപ്രകാരം പിഴ ചുമത്തിയതിനെത്തുടര്ന്ന് ഓള് കേരള ഡിസ്പോസബിള് ഡീലേഴ്സ് അസോസിയേഷനാണു ബോര്ഡിനെ സമീപിച്ചത്.
പട്ടികയുടെ പ്രിന്റ് എടുത്തു വ്യാപാര സ്ഥാപനങ്ങളില് പ്രദര്ശിപ്പിക്കാനാണു വ്യാപാരികളുടെ തീരുമാനം.
ബോര്ഡിന്റെ പട്ടിക പ്രകാരം നിരോധിച്ചവ:
∙ പ്ലാസ്റ്റിക് ക്യാരിബാഗ്, പ്ലാസ്റ്റിക് ഷോപ്പിങ് ബാഗ്
∙ പ്ലാസ്റ്റിക് അല്ലെങ്കില് പ്ലാസ്റ്റിക് ആവരണമുള്ള പേപ്പര് ഗ്ലാസ്
∙ പ്ലാസ്റ്റിക് ആവരണമുള്ള പേപ്പര് പ്ലേറ്റ്
∙ പ്ലാസ്റ്റിക് സ്ട്രോ
∙ പ്ലാസ്റ്റിക് പൊതിഞ്ഞ പേപ്പര് ഇല
∙ പ്ലാസ്റ്റിക് സ്പൂണ്
∙ തെര്മോക്കോള്, സ്റ്റിറോഫോം എന്നിവ ഉപയോഗിച്ചു നിര്മിച്ച പ്ലേറ്റ്, കപ്പ്, അലങ്കാര വസ്തുക്കള്
∙ പ്ലാസ്റ്റിക് ഗാര്ബേജ് ബാഗ് (ആശുപത്രി ആവശ്യത്തിന് ഉപയോഗിക്കാം)
∙ കാന്ഡി സ്റ്റിക്, പ്ലാസ്റ്റിക് സ്റ്റിക് ഉള്ള ഇയര് ബഡ്, പ്ലാസ്റ്റിക് സ്റ്റിക് ഉള്ള ബലൂണ്
∙ പ്ലാസ്റ്റിക് പൊതിഞ്ഞ ക്ഷണക്കത്ത്, സിഗരറ്റ് പാക്കറ്റ്, സ്വീറ്റ് ബോക്സ്
∙ 500 മില്ലിലീറ്ററില് താഴെ കുടിവെള്ളം പാക്ക് ചെയ്ത കുപ്പി, ബ്രാന്ഡഡ് അല്ലാത്ത പ്ലാസ്റ്റിക് ജ്യൂസ് പാക്കറ്റ്
∙ പിവിസി ഫ്ലെക്സ് വസ്തുക്കള്, പ്ലാസ്റ്റിക് ആവരണമുള്ള തുണിത്തരം
പട്ടിക പ്രകാരമുള്ള ബദലുകള്:
വളമാക്കി മാറ്റാവുന്ന ക്യാരി ബാഗ്, തുണി ബാഗ്, പേപ്പര് ബാഗ്
പോളി ലാക്റ്റിക് ആസിഡ് (പിഎല്എ) ആവരണമുള്ള പേപ്പര് കപ്പ്
പേപ്പര് പ്ലേറ്റ്
പേപ്പര് സ്ട്രോ
പ്ലാസ്റ്റിക് കണ്ടെയ്നര്
തടി സ്പൂണ്, സ്റ്റീല് സ്പൂണ്
വളമാക്കാവുന്ന ഗാര്ബേജ് ബാഗ്
പലചരക്ക്, പലഹാരം എന്നിവ
പാക്ക് ചെയ്യുന്ന 50 മൈക്രോണിനു മുകളിലുള്ള കവര്