തിരുവനന്തപുരം: കോവിഡ് കേസുകള് സംസ്ഥാനത്ത് വര്ധിച്ച് വരുന്ന സാഹചര്യത്തില് മാസ്ക് ഉപയോഗം കര്ശനമാക്കി സര്ക്കാര്.
പൊതുഇടങ്ങള്, ഒത്തുചേരലുകള്, ജോലി സ്ഥലങ്ങള്, വാഹനത്തില് യാത്ര ചെയ്യുമ്ബോള് എന്നിങ്ങനെയുള്ള സാഹചര്യത്തില് മാസ്ക് ധരിക്കുന്നത് നിര്ബന്ധമാക്കി സര്ക്കാര് ഉത്തരവിറക്കി.
ഉത്തരവ് ലംഘിച്ചാല് 2005-ലെ ദുരന്ത നിവാരണ നിയമം ഉള്പ്പെടെയുള്ള നിയമങ്ങള് അനുസരിച്ചുള്ള ശിക്ഷാ നടപടികള് കൈക്കൊള്ളുമെന്നും ഉത്തരവില് പറയുന്നുണ്ട്.
സംസ്ഥാനത്ത് കഴിഞ്ഞ ദിവസം റിപ്പോര്ട്ട് ചെയ്യപ്പെട്ടത് 2994 കോവിഡ് കേസുകളാണ്. 12 പേര് കോവിഡ് ബാധിച്ച് മരിക്കുകയും ചെയ്തിട്ടുണ്ട്. തിരുവനന്തപുരത്താണ് സംസ്ഥാനത്ത് കോവിഡ് കൂടുതല് റിപ്പോര്ട്ട് ചെയ്യുന്നത്. 782 കേസുകള്. എറണാകുളം, കോട്ടയം, കൊല്ലം, പത്തനംതിട്ട, ആലപ്പുഴ, തൃശൂര്, കോഴിക്കോട് ജില്ലകളിലാണ് കോവിഡ് കേസുകള് കൂടുന്നത്.
കഴിഞ്ഞ ഒരാഴ്ചയായി കോവിഡ് കേസുകള് 3000 നും മുകളിലായാണ് റിപ്പോര്ട്ട് ചെയ്യുന്നത്. ഒരാഴ്ചക്കിടെ 40 പേര് കോവിഡ് ബാധിച്ച് മരിച്ചിട്ടുമുണ്ട്. ഈ സാഹചര്യത്തിലാണ് മാസ് ഉപയോഗം കര്ക്കശമാക്കാന് തീരുമാനമായത്.