ട്രാഫിക് ഡ്യൂട്ടിക്കിടെ പോലീസുകാര് മൊബൈല് ഫോണ് ഉപയോഗിക്കുന്നത് നിയന്ത്രിക്കണമെന്ന് ഹൈക്കോടതി.
ട്രാഫിക് ഡ്യൂട്ടിക്ക് നിയോഗിച്ചിരിക്കുന്ന പോലീസുകാര് കൂടുതല് സമയവും മൊബൈല് ഫോണില് നോക്കിയിരിക്കുക ആണെന്നും ഇത് കര്ശനമായി തടയണമെന്നും ഹൈക്കോടതി പറഞ്ഞു. ട്രാഫിക് ഡ്യൂട്ടിക്കിടെ ഔദ്യോഗിക ആവശ്യത്തിന് അല്ലാതെ മൊബൈല് ഉപയോഗിക്കുന്നത് തടയണം എന്നാണ് ജസ്റ്റിസ് അമിത് റാവല് ഉത്തരവിട്ടിരിക്കുന്നത്.
പോലീസുകാര് മൊബൈലില് നോക്കിയിരിക്കുന്നത് ശ്രദ്ധയില്പ്പെട്ടാല് ആളുകള്ക്ക് ദൃശ്യങ്ങള് പകര്ത്തി ടോള് ഫ്രീ നമ്ബരുകളിലേക്ക് അയയ്ക്കാം. ഇതിനായി വാട്സാപ്പ് സൗകര്യമുള്ള രണ്ട് ടോള് ഫ്രീ നമ്ബര് അനുവദിക്കണമെന്നും നിര്ദേശിച്ചിട്ടുണ്ട്. കൊച്ചി നഗരത്തിലെ ട്രാഫിക്, പാര്ക്കിങ് പ്രശ്നങ്ങളുമായി ബന്ധപ്പെട്ട ഹര്ജികളിലാണ് കോടതിയുടെ ഉത്തരവ്.ട്രാഫിക് ഡ്യൂട്ടിയിലുള്ള പോലീസുകാര് മൊബൈലില് നോക്കിയിരിക്കുന്നത് സ്ഥിരം കാഴ്ചയാണെന്ന് കോടതി പറഞ്ഞു. നഗരത്തിലെ ഗതാഗതം സുഗമമാക്കാനുള്ള മറ്റു ചില നിര്ദേശങ്ങളും കോടതി പുറപ്പെടുവിച്ചിട്ടുണ്ട്.
നിരവധി ഉത്തരവുകളിലൂടെ തടഞ്ഞിട്ടും വാഹനങ്ങളില് ജോയി സ്റ്റിക്കുപോലെയാണ് ഹോണുകള് സ്ഥാപിച്ചിരിക്കുന്നത് എന്നു കോടതി പറഞ്ഞു. നഗരത്തില് ഹോണ് നിശ്ശബ്ദ മേഖലകള് ഏതൊക്കെയാണെന്ന് കണ്ടെത്തിയിട്ടുണ്ടെങ്കിലും ഇക്കാര്യം വ്യക്തമാക്കി ബോര്ഡുകള് ഇനിയും സ്ഥാപിച്ചിട്ടില്ല. 80 സ്കൂളുകള്, 21 കോളേജുകള്, 31 ആശുപത്രികള്, 11 മറ്റു നിശ്ശബ്ദ മേഖലകള് എന്നിവ നഗരത്തില് ഉണ്ട്.