തിരുവനന്തപുരം: സംസ്ഥാനത്ത് മങ്കിപോക്സ് സ്ഥിരീകരിച്ച സാഹചര്യത്തില് ആരോഗ്യ വകുപ്പ് സ്റ്റാന്ഡേര്ഡ് ഓപ്പറേറ്റിങ് പ്രോസീജിയര് പുറത്തിറക്കിയതായി ആരോഗ്യമന്ത്രി വീണാ ജോര്ജ്.
ഐസലേഷന്, ചികിത്സ, സാംപിള് കളക്ഷന് തുടങ്ങിയവയെല്ലാം ഉള്ക്കൊള്ളിച്ചുള്ളതാണ് എസ്ഒപി. എല്ലാ സര്ക്കാര്, സ്വകാര്യ ആശുപത്രികളും ഈ എസ്ഒപി പിന്തുടരണമെന്നും മന്ത്രി പറഞ്ഞു.
കഴിഞ്ഞ 21 ദിവസത്തിനുള്ളില് രോഗബാധിത രാജ്യങ്ങളില് പോയിട്ടുള്ള ഏതു പ്രായത്തിലുള്ള വ്യക്തിയാണെങ്കിലും ശരീരത്തില് ചുവന്ന പാടുകളോടൊപ്പം, പനി, തലവേദന, ശരീരവേദന, തളര്ച്ച തുടങ്ങിയ ഒന്നോ അതിലധികമോ രോഗലക്ഷണങ്ങളോ ഉണ്ടെങ്കില് മങ്കിപോക്സാണെന്ന് സംശയിക്കണം.
രോഗം ബാധിച്ച വ്യക്തിയുമായി മുഖാമുഖം വരിക, ആരോഗ്യ പ്രവര്ത്തകരുള്പ്പെടെ പിപിഇ കിറ്റിടാതെ ഇടപെടുക, നേരിട്ട് തൊലിപ്പുറത്ത് സ്പര്ശിക്കുക, കിടക്ക, വസ്ത്രം എന്നിവ സ്പര്ശിക്കുക, ലൈംഗിക ബന്ധം തുടങ്ങിയവയിലൂടെ രോഗസാധ്യത വളരെയേറെയാണ്.
ഇവര് പ്രാഥമിക സമ്ബര്ക്ക പട്ടികയിലാണ് വരുന്നത്. പിസിആര് പരിശോധനയിലൂടെയാണ് മങ്കിപോക്സ് സ്ഥിരീകരിക്കുക. മങ്കിപോക്സ് ബാധിച്ചതായി സംശയിക്കുന്നതും സാധ്യതയുള്ളതുമായ കേസുകള് വെവ്വേറെയായി ഐസലേഷനില് മാത്രം ചികിത്സിക്കുക.
രോഗിയെ ഐസലേറ്റ് ചെയ്ത ശേഷം ജില്ലാ സര്വൈലന്സ് ഓഫിസറെ (ഡിഎസ്ഒ) ഉടന് അറിയിക്കണം. ഇതോടൊപ്പം എന്ഐവി പ്രോട്ടോക്കോള് അനുസരിച്ച് സാംപിളുകള് ശേഖരിക്കണം. ശേഖരിക്കുന്ന സാംപിളുകള് ലാബില് അയയ്ക്കാനുള്ള ചുമതല ഡിഎസ്ഒയ്ക്കായിരിക്കും.
ഐസലേഷന് സൗകര്യമുള്ള സ്വകാര്യ ആശുപത്രികളില് എത്തുന്ന രോഗികളെ അവര് ആവശ്യപ്പെട്ടാല് മാത്രം സര്ക്കാര് ആശുപത്രികളിലേക്കു റഫര് ചെയ്യണം.
ഐസലേഷന് സൗകര്യമുള്ള സര്ക്കാര് ആശുപത്രിയില്നിന്നും ഗുരുതരാവസ്ഥയിലുള്ള രോഗികളെ മാത്രമേ മെഡിക്കല് കോളജുകളിലേക്കു റഫര് ചെയ്യാവൂ.
ഡിഎസ്ഒയ്ക്ക് ശരിയായ വിവരം നല്കി പ്രോട്ടോക്കോള് പാലിച്ചുകൊണ്ടായിരിക്കണം റഫറല് ചെയ്യേണ്ടത്. മങ്കിപോക്സ് സ്ഥിരീകരിച്ച കേസുകള്, കേന്ദ്രത്തിന്റെ കൃത്യമായ മാര്ഗനിര്ദേശങ്ങള് അനുസരിച്ചുവേണം കൈകാര്യം ചെയ്യേണ്ടത്.
മങ്കിപോക്സ് ബാധിതരുടെ ചികിത്സ സംബന്ധിച്ച് എന്തെങ്കിലും സംശയമുണ്ടെങ്കില്, സംസ്ഥാന മെഡിക്കല് ബോര്ഡുമായി ബന്ധപ്പെടണം.
രോഗിയെ ആംബുലന്സില് കൊണ്ടുപോകേണ്ടി വരുമ്ബോള് പിപിഇ കിറ്റ്, എന് 95 മാസ്ക്, ഗ്ലൗസ്, കണ്ണട എന്നിവ ധരിക്കണം. ഡിഎസ്ഒയുടെ നിര്ദേശപ്രകാരം മാത്രമേ ഒരാളെ കൊണ്ടുപോകാവൂ.
ഇതോടൊപ്പം ആശുപത്രിയേയും വിവരം അറിയിക്കണം. രോഗി എന് 95 മാസ്കോ ട്രിപ്പിള് ലെയര് മാസ്കോ ധരിക്കണം. മുറിവുകളുണ്ടെങ്കില് അതു മൂടത്തക്കവിധം വസ്ത്രം പുതപ്പിക്കണം.
രോഗിയെ എത്തിച്ച ശേഷം ആംബുലന്സും ഉപകരണങ്ങളും അണുവിമുക്തമാക്കണം. രോഗിയുമായി ബന്ധപ്പെട്ട സാധനങ്ങള് മാര്ഗനിര്ദേശമനുസരിച്ച് നിര്മാര്ജനം ചെയ്യണം.
പ്രാഥമിക സമ്ബര്ക്ക പട്ടികയിലുള്ളവര് രോഗലക്ഷണം പ്രകടിപ്പിക്കുന്നുണ്ടോയെന്ന് ആരോഗ്യ പ്രവര്ത്തകര് 21 ദിവസം വിലയിരുത്തും. ദിവസവും രണ്ടു നേരം ഫോണിലൂടെ ഇവരെ വിളിച്ചാണ് ഇക്കാര്യം ഉറപ്പു വരുത്തുന്നത്. മാത്രമല്ല അവരുടെ താപനില ദിവസവും രണ്ടു നേരം സ്വയം രേഖപ്പെടുത്തണം.
നിരീക്ഷണ ചുമതലയുള്ള ജെഎച്ച്ഐ/ജെപിഎച്ച്എന് അല്ലെങ്കില് ആശാ വര്ക്കര് ഇടയ്ക്കിടെ വീടു സന്ദര്ശിക്കണം. അവര് മാര്ഗനിര്ദേശങ്ങള് പാലിക്കുന്നുണ്ടെന്ന് ഉറപ്പാക്കുക.
പനി ഉണ്ടായാല്, അവരെ ഉടന് ഐസലേറ്റ് ചെയ്യുകയും ക്ലിനിക്കല്, ലാബ് പരിശോധന നടത്തുകയും വേണം. ചുവന്ന പാടുകള് പ്രത്യക്ഷപ്പെട്ടാല് സാംപിളുകള് മങ്കിപോക്സ് പരിശോധനയ്ക്ക് അയയ്ക്കണം.
നിരീക്ഷണ കാലയളവില് കൃത്യമായി മാര്ഗനിര്ദേശങ്ങള് പാലിക്കണം. പ്രതിരോധശേഷി കുറഞ്ഞവരും പ്രായമായവരും ഗര്ഭിണികളും കുട്ടികളുമായും വളര്ത്തുമൃഗങ്ങളുമായും സമ്ബര്ക്കം പാടില്ല.
അത്യാവശ്യമല്ലാത്ത യാത്രകള് ഒഴിവാക്കണം. രോഗലക്ഷണങ്ങളില്ലാത്ത സമ്ബര്ക്കം ഉള്ളവര് രക്തം, കോശങ്ങള്, ടിഷ്യു, അവയവങ്ങള്, സെമന് എന്നിവ ദാനം ചെയ്യാന് പാടില്ല.
മങ്കിപോക്സ് ബാധിച്ചവരുമായോ സംശയിക്കുന്നവരുമായോ സുരക്ഷിതമല്ലാത്ത സമ്ബര്ക്കം പുലര്ത്തുന്ന ആരോഗ്യ പ്രവര്ത്തകര് 21 ദിവസം നിരീക്ഷിക്കണം. രോഗ ലക്ഷണമില്ലെങ്കില് ഡ്യൂട്ടിയില് നിന്നും ഒഴിവാക്കേണ്ടതില്ല എന്നും എസ്ഒപിയില് പറയുന്നു.