നടിയെ ആക്രമിച്ച കേസിലെ ഒന്നാം പ്രതി പള്സര് സുനിയെ തൃശൂരിലെ മാനസികാരോഗ്യ കേന്ദ്രത്തിലേക്ക് മാറ്റി.
എറണാകുളം സബ് ജയിലില് നിന്നാണ് സുനിയെ മാനസികാരോഗ്യ കേന്ദ്രത്തിലേക്ക് മാറ്റിയത്. ചൊവ്വാഴ്ച വൈകീട്ടോടെ ഇവിടെ എത്തിക്കുകയായിരുന്നു. ചികിത്സയുടെ ഭാഗമായാണിത് എന്ന് ആശുപത്രി അധികൃതര് അറിയിച്ചു.
അഞ്ച് വര്ഷമായി സുനി ജയിലിലാണ്. കേസിലെ മറ്റെല്ലാ പ്രതികള്ക്കും കോടതി ജാമ്യം അനുവദിച്ചെങ്കിലും സുനിയുടെ കുറ്റം വളരെ ഗുരുതരമായത് കാരണം ജാമ്യത്തില് വിടാനാകില്ലെന്നാണ് സുപ്രീം കോടതിയുടെ കണ്ടെത്തല്. ആരോഗ്യ നില മോശമാണെന്നും ജാമ്യം അനുവദിക്കണമെന്നുമാവശ്യപ്പെട്ട് സുനി സുപ്രീം കോടതിയെ സമീപിച്ചിരുന്നു. എന്നാല് ഈ ഹര്ജി ജൂലൈ 13 ന് കോടതി തള്ളി.
സുനിക്കെതിരായ ആരോപണങ്ങള് അതീവ ഗൗരവമേറിയതാണെന്ന് സുപ്രീം കോടതി ചൂണ്ടിക്കാട്ടി. ആക്രമിക്കപ്പെട്ട നടി പോലീസിനും പിന്നീട് കോടതിയിലും നല്കിയ മൊഴിയില് പള്സര് സുനിക്ക് എതിരായ ആരോപണങ്ങളില് ഉറച്ച് നില്ക്കുകയാണ്. ഈ സാഹചര്യത്തില് ജാമ്യം അനുവദിക്കാനാകില്ലെന്ന് സുപ്രീം കോടതി പറഞ്ഞു. തുടര്ന്ന് ഹര്ജി ഹൈക്കോടതിയില് സമര്പ്പിക്കാനും നിര്ദ്ദേശിച്ചു.