വാരാന്ത്യത്തില് അഞ്ച് ശതമാനം ജിഎസ്ടിക്കെതിരായ ഏകദിന പണിമുടക്ക് കാരണം വിപണിയിലെ വിതരണം കൂടുതല് കുറഞ്ഞു. മൊത്തക്കച്ചവട വിപണിയില് പച്ചക്കറിയുടെ ലഭ്യത 40 ശതമാനം കുറഞ്ഞതായി അഗ്രികള്ചര് പ്രൊഡ്യൂസ് മാര്കറ്റ് കമിറ്റിയിലെ (APMC) വ്യാപാരി പറഞ്ഞു.
ചില്ലറ വില്പനയില് കോളിഫ്ലവര് കിലോയ്ക്ക് 100 രൂപയില് എത്തിയപ്പോള് മുരിങ്ങയ്ക്കയ്ക്ക് കിലോയ്ക്ക് 80 മുതല് 120 രൂപ വരെയാണ് വില. മുംബൈയിലേക്ക് പച്ചക്കറി എത്തുന്നത് പ്രധാനമായും നാസിക്, പൂനെ, കോലാപൂര്, സാംഗ്ലി, പശ്ചിമ മഹാരാഷ്ട്ര, കര്ണാടക എന്നിവിടങ്ങളില് നിന്നാണ്. മഹാരാഷ്ട്രയുടെ മിക്ക ഭാഗങ്ങളിലും കനത്ത മഴ പെയ്തതിനാല് വിതരണം കുറഞ്ഞു.
വിവിധ ധാന്യ ഇനങ്ങള്ക്കും രജിസ്റ്റര് ചെയ്യാത്ത ബ്രാന്ഡുകള്ക്കും അഞ്ച് ശതമാനം ജിഎസ്ടി ഏര്പെടുത്തിയതിനെതിരെ ശനിയാഴ്ച എപിഎംസിയിലെ പച്ചക്കറി കടകള് ഉള്പെടെ അഞ്ച് മാര്കറ്റുകളും അടച്ചിരുന്നു. തിങ്കളാഴ്ച എപിഎംസിയിലെത്തിയത് ആകെ 455 പച്ചക്കറികള് നിറച്ച വാഹനങ്ങളാണ്. എന്നിരുന്നാലും, അവയില് ഭൂരിഭാഗവും ചെറിയ പികപ് വാനുകളായിരുന്നു, അത് കുറഞ്ഞ അളവില് ഉല്പന്നങ്ങളാണ് കൊണ്ടുവന്നത്.